Венгрия пойтахти Будапешт шаҳрида давом этаётган спорт курашлари бўйича жаҳон чемпионатида юнон-рум кураши усталари ғолиблик учун курашни давом эттирмоқда. 26 октябрь кунги дастурдан ўрин олган баҳсларда ўзбекистонлик уч нафар спортчи жаҳон чемпионатидаги иштирокини бошлади.
-60 кг вазнда гиламга чиққан Фируз Тўхтаев саралашда хорватиялик Иван Лизатовични муддатидан олдин (9-0) мағлуб этганди, бироқ нимчорак финалда кубалик Луис Алберто Санчесга 8-4 ҳисобида имкониятни бой бериб қўйди.
- 67 кг вазнда иштирок этган Мирзобек Раҳматов эса саралаш босқичидаёқ олимпиада ўйинлари чемпиони кубалик Исмаэл Борреро Молинага дуч келиб қолди ва унга 6-1 ҳисобида ютқазиб қўйди.
Иккала кубалик спортчи ҳам кейинги босқичларда имкониятни бой бергани сабабли Тўхтаевда ҳам, Раҳматовда ҳам медаллар учун курашиш имконияти қолмади. Натижада улар, мусобақадаги иштирокини якунлади.
87 кг вазнда гиламга чиқаётган Рустам Ассакалов эса аввалига хитойлик Феи Пенгни муддатидан олдин (10-0), нимчорак финалда германиялик Денис Кудлани 5-2 ҳисобида мағлуб этганди. Аммо чорак финалда у россиялик Бекхан Оздоевга 6-4 ҳисобида ютқазиб қўйди. Агар Оздоев ярим финалда ҳам ғалаба қозонса, Ассакаловда бронза медали учун курашиш имконияти қолади.
