Vengriya poytaxti Budapesht shahrida davom etayotgan sport kurashlari bo‘yicha jahon chempionatida yunon-rum kurashi ustalari g‘oliblik uchun kurashni davom ettirmoqda. 26 oktyabr kungi dasturdan o‘rin olgan bahslarda o‘zbekistonlik uch nafar sportchi jahon chempionatidagi ishtirokini boshladi.
-60 kg vaznda gilamga chiqqan Firuz To‘xtayev saralashda xorvatiyalik Ivan Lizatovichni muddatidan oldin (9-0) mag‘lub etgandi, biroq nimchorak finalda kubalik Luis Alberto Sanchesga 8-4 hisobida imkoniyatni boy berib qo‘ydi.
- 67 kg vaznda ishtirok etgan Mirzobek Rahmatov esa saralash bosqichidayoq olimpiada o‘yinlari chempioni kubalik Ismael Borrero Molinaga duch kelib qoldi va unga 6-1 hisobida yutqazib qo‘ydi.
Ikkala kubalik sportchi ham keyingi bosqichlarda imkoniyatni boy bergani sababli To‘xtayevda ham, Rahmatovda ham medallar uchun kurashish imkoniyati qolmadi. Natijada ular, musobaqadagi ishtirokini yakunladi.
87 kg vaznda gilamga chiqayotgan Rustam Assakalov esa avvaliga xitoylik Fei Pengni muddatidan oldin (10-0), nimchorak finalda germaniyalik Denis Kudlani 5-2 hisobida mag‘lub etgandi. Ammo chorak finalda u rossiyalik Bekxan Ozdoyevga 6-4 hisobida yutqazib qo‘ydi. Agar Ozdoyev yarim finalda ham g‘alaba qozonsa, Assakalovda bronza medali uchun kurashish imkoniyati qoladi.
