Pepsi Суперлига 28-турида “Сўғдиёна” Навоийда “Қизилқум”га қарши баҳс олиб борди ва дуранг (2:2) қайд этди. Ўйиндан сўнг “Сўғдиёна” бош мураббийи Сергей Лушчан ўйин борасида ўз фикрлари билан ўртоқлашди.

- “Қизилқум” га қарши ўйнаш доимо қийин. Жамоа таркибида тажрибали футболчилар йиғилган. Қарши хужумлардан унумли фойдалана олмадик. Қийинчилик билан бўлса-да мағлубиятдан қутулиб қолдик. Ортга йўлимиз йўқ. Ҳар бир очко олтингга тенг. Агар йигитлар мана шундай ўйинни намойиш қилишда давом этишса, ўйлайманки, кейинги учрашувларда имкониятларимиз бор.

Бугун таркибда ўзгариш қилдик. Санжар Рашидов, Ихтиёр Тошпўлатов, Дарвидас Сернас захирада қолдирилди. Улар кучли жиҳатларга эга бўлса-да ,ўйиндан келиб чиққан ҳолда ротация қилишга қарор қилдик ва ёшларга имкон бердик. Элёр сафга қайтди ва биз бундан хурсандмиз. Ҳа, кейинги ўйинни Шоҳруз Норхонов ўтказиб юборади. Шоҳруз жуда кучли футболчи, у — жамоа лидери, лекин на илож. Етакчи жамоалар ҳам ўз етакчисисиз ўйинни қураётганини кузатаяпмиз, — дейди тажрибали мураббий.

“Сўғдиёна” ПФК матбуот хизмати