23 ноябрь куни старт оладиган турнирда Ўзбекистон, Тожикистон, Афғонистон, Эрон ҳамда Қирғизистон миллий аёллар терма жамоалари иштирок этишади. Матбуот анжуманида Афғонистон миллий терма жамоаси бош мураббийи Али Жавад Атайи, Ўзбекистон терма жамоаси бош мураббийи Баҳром Норсафаров, Тожикистон терма жамоаси бош мураббийи Сулаймон Бобокалонов ҳамда Қирғизистон мураббийи Гульбара Уматалиева иштирок этишди.
Али Жавад Атейи: “Мусобақага таклиф қилишгани учун рахмат. Мусобақага барча жамоалар оптимистик кайфият билан ташриф буюришган. Жамоамиз ёш, аммо, шунга қарамай энг яхши ўйинимизни кўрсатишга ҳаракат қиламиз”.
Сулаймон Бобокалонов: “Аввалроқ Токио олимпиадаси учун саралаш баҳсларида иштирок этдик. Мусобақа олдидан бир неча футболчиларимизда жароҳатлар бор. Бунгача жуда кўп турнирларда иштирок этдик ва ўйлайманки, CAFA мусобақаси ҳам бизга анча фойда бўлади”.
Гулбара Уматалиева: “Таклифингиз учун миннатдорчилик билдирамиз. Ҳозирда кўпчилик аёллар оилавий сабаблар туфайли футболдаги фаолиятини якунлаётгани учун, миллий терма жамоалар бундан азият чекаяпти. Шунинг учун ҳам, терма жамоаларда асосан ёш футболчилар ўйнаяпти. Бу мусобақалар эса, миллий терма жамоаларни кучайтириш учун ёрдам бериши мумкин. Асосий таркибдаги футболчилар асосан ёш футболчилар. Бундай мусобақалар эса катта тажриба олиб келиши мумкин. Ён қўшниларимиз билан бундай мусобақаларда кўпроқ иштирок этишни ва тажриба орттириш тарафдориман”.
Баҳром Норсафаров: “Ўзбекистонга хуш келибсиз. Асосий мақсадимиз – миллий терма жамоага ёшларни саралаш. Мусобақага бир қанча ёш футболчиларни ҳам таклиф этганмиз ва бу улар учун Осиё чемпионати саралаши учун тайёрарлик вазифасини бажариши лозим. Чемпионат учрашувлари энди якунланди ва футболчилар бироз чарчашган. Аммо, шунга қарамай, ушбу мусобақада яхши иштирок этишни мақсад қилганмиз”.
