Металлург – Бухоро жамоалари учрашувидан кейин ҳар иккала жамоа мураббийлари ўйин ҳақидаги фикрларини билдириб ўтди. Даставвал Бухоро жамоаси бош мураббийи Улуғбек Бақоевнинг фикрлари билан қизиқдик:

- Бугун жуда қизиқарли ўйиннинг шоҳиди бўлдик. Ҳар иккала жамоа яхши имкониятларга эга бўлишди. Афсуски биз вазиятлардан фойдалана олмадик. Металлургни ғалаба билан табриклайман. Футболчиларимга эса бугунги меҳнатлари учун миннатдорчилик билдираман.

Кейинги мавсум жуда масъулиятли. Терма жамоамиз Осиё кубогида қатнашади. Уларга омад,  мухлисларимизга эса ҳаяжонли лаҳзаларни тилайман.

Бевосита мавсум ҳақида гапирадиган бўлсам у иккиёқлама таасссурот қолдирди. Жамоамизда кўтарилишлар ҳам,  пасайишлар ҳам кузатилди.Энг асосийси кучлилар қаторидан жой эгалладик.

Мана бугунги ўйин билан 2018 йилги чемпионат якунига етди. Мен учун мураббий сифатида иккинчи мавсум бўлди. Жамоам билан бу йил ҳам ўтган йилдаги каби 6-ўринни эгалладик. Бу йилги чемпионат ўзига яраша қизиқ ва шиддатли ўтди дейиш мумкин.

Мавсум давомида бизни қўллаб-қувватлаган барча мухлисларга, раҳбариятга ҳамда футболчиларимга ва клуб ходимларига ташшакур дейман. Ўзимга келсак, мураббийлик соҳасида яна кўпроқ изланишим ўқишим керак деб ҳисоблайман. Шу сабабли бугун жамоа бош мураббийлигидан бўшаш аризасини ёзишга қарор қилдим. Бу қарорга келишим жуда оғир бўлди. Мен ўз юртимни, ўз шаҳримни ва футболда ўтган йилларимда мен билан бирга бўлган барчани яхши кўраман.

Мени футболчи бўлиб етишишимда Бухоронинг ўрни катта. Шу ерда улғайдим, футбол сабаб бошқа юртларда ҳам тўп тепдим. Орзу қилардимки, бир кун келиб шу жамоада мураббий бўлишни. Мана орзуларим амалга ошиб икки йил жамоани бошқардим. Шу икки йилда Бухоро учун юракдан меҳнат қилдик.

Жамоа ҳар икки мавсумда чемпионат етакчиларига қарши муносиб рақобат кўрсата олди. Бугунги қароримни барча тўғри тушунади деган, умиддаман. Бухоро ҳамиша мани қалбимда яшайди. Мени қўллаб-қувватлаган барчага ўз миннатдорчилигимни изҳор этаман”, - дейди Улуғбек Бақоев.