“ЎФА ва ЎзПФЛ томонидан ўтказиладиган мусобақаларда иштирок этувчи футбол клубларини лицензиялаш ва профессионал футбол клуби мақомини белгилаш бўйича регламент” ишлаб чиқилгани ва унинг ЎФА Ижроқўми бюроси томонидан тасдиқлангани ҳақида хабарингиз бор.

Таъкидланганидек, ПФЛ мазкур регламент асосида футбол клубларини келаси мавсум учун тайёрлаб боради.

Ишчи гуруҳ 4 декабрьда дастлаб Жиззахга келди ва “Сўғдиёна” клубидаги шароитларни текширди. Сўнгра 5 декабрьда Самарқанднинг “Динамо” клубида бўлди.

“Динамо” футбол клубида қилинган мониторинг бўйича ҳулосалар:

- Стадион майсаси қониқарли ҳолатда, лекин клуб уни яхшилаш учун чим билан ишлайдиган мутахассисларни жалб этган;

- Клуб академияси Самарқанд вилояти футбол Ассоциацияси билан ҳамкорликда ишлайди;

- Клуб учун янги автобус сотиб олинди; ҳамда

- Стадион ёритгичлари талабларга жавоб бермайди.

Бундан ташқари ишчи гуруҳ 5 декабрьда Ғузорда бўлиб, “Шўртан” клуби шароитлари билан танишди.

“Шўртан” футбол клубида қилинган мониторинг бўйича ҳулосалар:

- Клуб академияси тайёр ва 2019 йилнинг январь ойидан ишга тушади;

- Майдон чими ва трибуналарини таъмирлаш бўйича ишлар олиб борилмоқда;

- Стадион ёритгичлари талабга жавоб бермайди.

Ҳозирда, талабларни бажариш учун клуб режа асосида иш бошлаган. Жумладан, стадион майсаси, трибуна ва бошқа масалаларда иш аллақачон бошлаб юборилгани ойдинлашди. Ишчи гуруҳ бугунги ташриф чоғида шунингдек, клуб мутасаддиларига керакли соҳалар бўйича маслаҳат ва таклифлар берди.

Ташриф чоғида, клуб мутасаддилари шунингдек, маркетинг ҳамда медиа соҳаларини ривожлантириш учун ҳаракат қилишаётганини таъкидлашди. Мухлислар билан ишлашда ҳам, клуб айни дамда фаол мухлисларни клубга штат асосида жалб қилишни режалаштирган. 

Маълумот учун, ПФЛ мониторинг гуруҳи 6 декабрь куни Бухоронинг “Бухоро” ва Навоийнинг “Қизилқум” клубларини мониторинг қилади.