Бирлашган Араб Амирликларида бўлиб ўтаётган клублар ўртасидаги жаҳон чемпионатида иккинчи финалчининг номи маълум бўлди.

Япониянинг «Кашима Антлерс» клуби "Реал"га қарши баҳснинг биринчи бўлимида номдор рақиб билан тенгма-тенг кураш олиб борди. Тайм сўнгида Бэйл-Марсело иштирокидаги "девор" услуби мадридликлар учун самарали чиқди. Марселонинг ажойиб узатмасидан кейин уэльслик футболчи дарвозабон билан яккама-якка вазиятга чиқди ва олис бурчакни ишғол қилди.

Иккинчи бўлим аввалида японияликлар иккита қўпол хатога йўл қўйишди. Бэйл ҳар иккала вазиятдан унумли фойдаланиб, ҳисобни йирик кўринишга келтирди.

Ўйин тугашига 12 дақиқа қолганида осиёликлар битта жавоб тўпини киритишга муваффақ бўлишди.

Шу тариқа, "Реал" мусобақа финалига йўл олди. "Қироллик клуби" бош соврин учун мезбон жамоа — "Ал-Айн"га қарши майдонга чиқади.

Клублар ўртасидаги жаҳон чемпионати, ярим финал
Кашима Антлерс Япония – Реал Мадрид Испания 1:3 (0:1, 1:2)
Голлар: 0:1 – 44 Бэйл, 0:2 – 53 Бэйл, 0:3 – 55 Бэйл, 1:3 – 78 Дои.
Кашима Антлерс – Гвон Сун Тхэ, Чжон Сын Хен, Ямамото, Ниси (Андзаи, 56), Седзи, Лео Сильва, Нагаки (Утида, 46), Сержиньо, Эндо (Леандро, 83), Дои, Абе.
Реал Мадрид – Куртуа, Варан, Марсело, Карвахаль, Рамос, Модрич, Льоренте, Васкес (Иско, 68), Кроос, Бэйл (Асенсио, 60; Каземиро, 74), Бензема.
Огоҳлантиришлар: Карвахаль (42), Ямамото (52).