Ўзбекистон миллий терма жамоаси Дубай шаҳрида Осиё Кубогига тайёргарликни давом эттирмоқда. Бугун Эктор Купер бошчилигидаги футболчилар иккинчи машғулотни ўтказишди.
БАА футбол федерациясига қарашли майдонда ўтган машғулотлар одатдагидек енгил машқлар билан бошланди. Кейин тўп билан ишланди. Бугун асосий эътибор дарвозага зарба йўллашга қаратилди.
Таркибдаги барча футболчилар бир неча мартадан дарвозаларга зарбалар йўллади. Терма жамоа дарвозабонлари галма-галдан дарвозага туриб, бу зарбаларни қайтаришга уриндилар. Дарвозабонлар мураббийи Денис Иванков уларни назорат қилди.
Бугунги машғулотлар юқори кайфиятда якунига етди. Таркибдаги барча футболчилар яхши жисмоний ҳолатда бўлиб турибди.
Эслатиб ўтамиз, Ўзбекистон миллий терма жамоаси Осиё Кубогидаги илк учрашувни 9 январь куни Уммон терма жамоасига қарши ўтказади. Ўйин Тошкент вақти билан соат 18:30да бошланади.
