Мана Осиё кубоги ҳам старт олди. Бир нечта сенсацион натижалар ҳам кўришга улгурдик. Лекин, сизга ҳам Осиё кубогига нимадир етишмаётгандек туюляптими?

Ҳа, албатта, ахир терма жамоамиз ҳали майдонга тушмадида! Бесабрлик қурсин, лекин нима қилайлик Ватанимизни шунчалар яхши кўрсак?!

Тўғриси, юртимиз бош жамоаси ижросидаги ўйинларни нафақат мен, балки бутун халқимиз орзиқиб кутмоқда. Ахир, анчадан бери расмий ўйинларда кўриниш бермаган юртимиз бош жамоаси ўйинларини жуда ҳам соғиндик. Қирқига чидаган қирқ бирига ҳам чидашимиз керак, на чора?!

Турнирни кузатиб борарканман, бир нарсанитушуниб етяпман. Ҳали бу турнирда сенсацион натижалар кўп бўладиганга ўхшаяпти. Осиё жамоаларининг ҳам даражаси ва савияси анча бир-бирига яқинлашиб қолгани яққол сезлимоқда. Бундан ташқари 24 жамоанинг иштирок этаётгани ҳам турнирга ўзгача қизиқиш уйғотяпти, менимча.

Бундан кўриниб турибдики, термамиз учун ҳеч қайси учрашув осон ўтмайди. Гуруҳимизда соддароқ кўринган Уммон ва Туркманистон термалари ҳам осонликча очко бермасликлари аниқ. Шу сабаб, ғалабалар биз ўйлаганчалик йирик ҳисобларда бўлмаса, бундан фожеа ясамаслик зарур. Сабаби, бу катта мусобақа ва унда ўйинлар кўп. Ҳам руҳан, ҳам жисмонан кучни тежаш ва чемпион бўлиш учун Купернинг ўйин услуби қўл келиши мумкин. Бироз зерикарли кўринсада эҳтиёткор ва ишончли футбол ҳозирда ғалабанинг калити эканлигини Франция термаси ЖЧда кўрсатиб қўйгани ёдингизда бўлса керак.

Масъулиятли ўйинлар олдидан термамиз футболчиларига омад ва зафарлар тилаб қоламиз. Ҳурматли футолчилар, бизни узоқ куттирганга яраша турнирда узоқроқ қолишингизни ва албатта юртимизга чемпион бўлиб қайтишингизни Яратгандан тилаб қоламиз.

Яҳёхўжа Улуғхўжаев