Кеча футбол бўйича Ўзбекистон миллий терма жамоаси Осиё Кубогидаги иштирокини ғалаба билан бошлади. Йигитларимиз биринчи турда Уммон терма жамоасини 2:1 ҳисобида мағлуб этишди. Биз эса ўйинни якуний ҳуштак чалингунча ҳаяжон билан кузатдик. 

Биласизми? Мазкур учрашув олдидан терма жамоамиз бош мураббийи ёрдамчиси Маҳмуд Фаёз ва видеотасвирчи Жамолиддин Солиҳов футболчиларимиз учун ўзига хос сюрприз тайёрладилар. Аниқроғи, ҳар бир футболчининг хоналари эшигига гол киритган ёки ғалаба қозонган пайтдаги ҳиссиётлари акс этган суратлар илиб чиқилди. Футболчилар эрталаб уйғониб, хонадан чиқишганида рухлантирувчи, юқори кайфият бағишловчи ана шу суратларни кўришлари мумкин эди. Шунингдек, уларда ғалабага чорловчи шиорлар ҳам ёзилганди: "Осиё кубоги бизники!", "Иложсиз нарсанинг ўзи йўқ", "Сиз ўз мақсадингизга эриша оласиз!".