УЕФА еврокубокларнинг плей-офф ўйинларида қўлланадиган сафардаги гол қоидасини бекор қилиши мумкин.
Kicker хабарига кўра, УЕФА ижроқўми Римда ўтказиладиган анжуманда бу масалани кўриб чиқади ва қоидани бекор қилишни тавсия этади.
Аввалроқ, Англияда сафардаги гол қоидаси бекор қилинган эди. Хусусан, Англия Лигаси Кубоги яримфиналидан ўрин олган «Челси» - «Тоттенҳэм» ўйини 2:1 ҳисобида якунланганидан сўнг, дастлабки ўйинда 0:1 ҳисоби қайд этилган бўлса-да, пенальтилар серияси белгиланиб, унда «Челси» ғалаба қозонган эди. Агар сафардаги гол қоидаси амал қилганида, «Тоттенҳэм» кейинги босқичга чиққан бўларди.
Бироз олдинроқ, футбол қоидалари билан шуғулланувчи Халқаро футбол ассоциациялар кенгаши (IFAB) барча федерацияларга сафардаги гол қоидасини бекор қилиш ва қўшимча вақтлардан воз кечиш ҳуқуқини берган эди.
