"Барселона" бош мураббийи Эрнесто Вальверде Испания кубоги ярим финал босқичи доирасида "Реал"га қарши бўладиган ўйин олдидан ўз фикрлари билан ўртоқлашди.

"Ушбу тўқнашувда фаворит йўқ. Бизда ҳам, рақиб жамоа сафида ҳам ажойиб ўйинчилар бор.

Тақвим ҳақиқатан ҳам қийин. Назаримда, мавсумнинг энг ҳал қилувчи палласи бошланмоқда. Артур? Унинг амбициялари юқори ва ҳамиша тўп билан ҳаракат қилишни истайди. У жамоанинг ўйинига яхши мослашиб кетди ва Артурнинг фойдаси кўп тегмоқда.

Месси? Унинг таркибга кириши ёки майдон ташқарида қолиши бизнинг режамизни ўзгартирмайди. Ҳамиша ўз ўйинимизни намойиш қилишга — тўпни назорат қилишга ва голлар уришга ҳаракат қиламиз. Суарес — кўп жиҳатдан ишончли ўйин кўрсатади. Месси билан у яхши тил топишади. Бу эса бизга ёрдам беради. Лео ўзини яхши ҳис қилса, "эл-класико"да майдонга тушади. Ҳозирча эса бирор нарса дейиш қийин", — деди Вальверде.