Бугун тунда Каталонияда Испания кубоги ярим финали дастлабки учрашуви бўлиб ўтади. Унда мамлакатнинг энг кучли икки клуби "Барселона" ва "Реал" клублари баҳс олиб боради. Икки жамоа бош мураббийлари учрашув ҳақидаги фикрларини билдириб ўтди.
Эрнесто Вальверде Месси ҳақида: Агар Месси ўзини яхши ҳис қилса у майдонга тушади. Олдинда яна бир машғулот бор. Агар у тўлиқ юкламаларга тайёр бўлса, шунга қараб иш тутамиз. Баъзида охиригача кутишга тўғри келади. Лекин мен ўз етакчим билан таваккал қилмоқчи эмасман. Олдинда ҳали ўйинлар жуда кўп.
Сантьяго Солари: “Барселона”га қарши учрашув қийин бўлиши аниқ. Месси? Яхши футболчи ҳар бир учрашувда иштирок этгани яхши. Месси бизнинг ўйинимизга халал бермайди. Бу худди, Ривер - Бока, Интер - Милан сингари катта ўйин бўлади. Биз бундай ўйинларда майдонга тушишни яхши кўрамиз.
Эрнесто Вальвереде: Ушбу тўқнашувда фаворит йўқ. Бизда ҳам, рақиб жамоа сафида ҳам ажойиб ўйинчилар бор.
Тақвим ҳақиқатан ҳам қийин. Назаримда, мавсумнинг энг ҳал қилувчи палласи бошланмоқда.
Сантьяго Солари тақвим ҳақида: Рақибга нисбатан бир кун кам дам олаётганимиз — жуда қизиқ. Умид қиламан, бу атайлиб қилинмаган. Бу саволни тақвим тузаётган одамларга берсангиз яхши бўларди. Бизнинг вазифамиз — ўзимизнинг энг яхши ўйинимизни намойиш қилишдан иборат.
Эрнесто Вальвереде Артур ҳақида: Артур? Унинг амбициялари юқори ва ҳамиша тўп билан ҳаракат қилишни истайди. У жамоанинг ўйинига яхши мослашиб кетди ва Артурнинг фойдаси кўп тегмоқда.
Сантьяго Солари: Тактик жиҳатдан сюрпризлар бўлишини ҳеч қачон олдиндан айтиб бўлмайди. Бу фақат бир жамоага боғлиқ эмас. Чиройли ўйин кўрсатишни истаймиз. Бу класико, ундан барча роҳатланишини хоҳлаймиз: чиройли ўйин намойиш қилиб, ғалаба қозонмоқчимиз.
Эслатиб ўтамиз, мазкур баҳс 6 февралдан 7 февралга ўтар кечаси 01:00да бошланади.
