Ла-Манш бўғози яқинидаги Гернси ороли полицияси Англиянинг “Кардифф” клуби ҳужумчиси Эмилиано Сала ҳалокатга учраган самолёт бортида футболчининг жонсиз танаси борлигини тасдиқлади. Бу ҳақда WorldNews нашри маълум қилди.
Аввалроқ, Сала ўтирган самолётдан топилган жасад қуруқликга олиб чиқилган эди. Самолёт бортидан кимнинг танасини чиқарилганлиги ошкор қилинмаётган эди. Тана кимга тегишли эканини ўрганиб чиқиш натижасида экспертлар полицияга мурда Эмилиано Сала эканлигини маълум қилишди. Ушбу самолёт бортида Эмилиано Сала ва учувчи Дэвид Айбботсон бўлган.
Маълумот ўрнида, 21 январь куни кечқурун Эмилиано Сала Франциянинг “Нант” клубидаги жамоадошлари билан хайрлашиб, “Кардифф Сити” билан шартнома имзолаш мақсадида, хусусий самолётда Уэльсга учиб кетади.
Бироқ, самолёт кўзланган манзилга етиб келишидан 1 соат олдин радарлардан йўқолиб қолди. Футболчи ҳалокатга учрашидан аввал WhatsApp’даги чатга “ҳозир самолёт парчаланиб кетса керак”, деган хабарни жўнатишга улгурган эди.
Самолёт қолдиқлари 3 февраль куни денгиз остидан топилди. Уни излаш ишларига хайрия асосида катта миқдорда маблағ тўпланди.
Эмилиано Рауль Сала Таффарель – 1990 йил 31 октябрь куни Аргентининг Лас-Колоньяс департаментида дунёга келган.