Бугун Осиё чемпионлар лигасининг 2-саралаш босқичидан ўрин олган “Пахтакор” – “Эйр Форс” учрашувига бағишланган матбуот анжумани бўлиб ўтди.

Ушбу матбуот анжуманида “Шерлар” бош мураббийи Шота Арвеладзе фикрларини билдириб ўтди.

“Бошланаётган футбол мавсуми билан табриклайман. Биз яхши ўйин намойиш этган ҳолда мухлисларни хурсанд этишни истаймиз. Ҳаво илиқ бўлиши кутилмоқда, стадионга кўплаб ишқибозлар келишини кутмоқдаман.

Рақибнинг бир неча ўйинларини ўргандик. Улар тажрибали жамоа,  уч бор ОФК Кубогида ғолиб чиқишди. Лекин уйда биз ғалаба қозонишни мақсад қилганмиз. 

Тайёргарлик даврида бошида таркиб тўлиқ бўлмади, кўп ўйин ўтказмадик. Вазиятдан чиқишга уринамиз. Таркибга имкон қадар зарур ўйинчилар таклиф этилди.

Эътиборни маҳаллий футболчиларга қаратдик. Ўйнаш учун барчада имкон бўлади. Янги ўйинчиларга ишончимиз борлиги учун улар билан шартнома имзоладик. Улардан кўп нарса кутиб қоламиз”, - дейди Арвеладзе.