Хабарингиз бор, айни пайтда Наманганнинг “Навбаҳор” клуби ўз ўқув- машғулот йиғинини Туркиянинг Анталия шаҳрида ўтказмоқда. Мазкур йиғин доирасидаги илк назорат-синов баҳсини жамоамиз Руминиянинг “Университатя - Клуж” клубига қарши ўтказиб, 1:0 ҳисобида ғалаба қозонди. Ягона гол учрашувнинг 30-дақиқасида пенальтидан урилди. Ўн бир метрли жарима зарбасини сербиялик ҳимоячи Славко Лукич аниқ амалга оширди.

Мазкур ўйинда “лочинлар” устози Андрей Канчельскис майдонга қуйидаги футболчиларни туширди: Ўткир Юсупов, Игорь Голбан, Ҳожиакбар Юнусов, Жаҳонгир Меҳмонов, Славко Лукич, Абдужамол Исроилов, Шаҳзод Шайманов, Аббос Ғуломов, Иван Соловьёв, Зафар Тўраев, Александр Касьян.

Захирадан майдонга тушганлар: Обид Жўрабоев, Ғиёс Комилов, Баҳодир Насимов, Камрон Нажафалиев, Жасур Азимов.

Ўз ўрнида таъкидлаш жоизки, ушбу баҳснинг 66-дақиқасида Абдужамол Исроилов қизил карточка олиб, майдонни тарк этди.  Натижада  жамоамиз аъзолари майдонда бир киши кам бўлиб қолишди. Шундай бўлса-да, “лочинлар”  ғалабани сақлаб қолишнинг уддасидан чиқишди.

“Навбаҳор” Анталияда яна 2 та назорат-синов учрашуви ўтказишни режалаштирган. “Лочинлар”нинг кейинги рақиблари Швейцария ва Туркия жамоалари бўлишади. 

“Навбаҳор” ПФК матбуот хизмати.