"Интер" ҳужумчиси Мауро Икарди ва клуб раҳбарияти ўртасидаги можарога барҳам берилди.

Аргентиналик футболчи жума куни "нерадзурри" спорт директори Жузеппе Маротта билан учрашди. Томонлар сўнгги пайтда рўй бераётган можароли саволларни ҳал қилиб олишди. Бу ҳақда Goal нашри хабар тарқатди.

Икарди жамоадошлари ва бош мураббий Лучано Спалетти билан муносабатларни аввалги ҳолатга келтириб олишни истамоқда. Ҳозирча Мауронинг қачон таркибга қайтиши борасида аниқ маълумот йўқ.

Икарди сўнгги марта 9 февраль куни "Интер" сафида майдонга тушганди. Шундан сўнг у Спалетти билан тортишиб қолиб, сардорлик боғичидан маҳрум этилганди. Шу боис, у жамоа билан янги шартнома имзолашдан бор тортди. Мауро сўнгги ҳафталарда индивидуал равишда шуғулланмоқда.

Футболчи 17 март куни "Милан"га қарши кечадиган дербида майдонга тушиши мумкин.

Икарди ушбу мавсумда "Интер" сафида 20та ўйинда майдонга тушиб, 9та гол урди ва 2та голга ассистентлик қилди.