Ҳозиргина якунланган саҳна асари стадионга йиғилган мухлисларни сира қувонтирмади. Сабаби, асар сенарийси жуда жўн ёзилгани етмагандек, асар сўнгига бормай воқеалар ривожи қандай якунланишини кўпчилик сезиб қолди. Биринчи бўлимда, э йўғе,  биринчи парда чоғида оқлардан бири сал қолса импровизация қилиб юборишига бир баҳя қолди…

Иккинчи пардада  асарнинг кулминацион нуқтасини кутиб,  томошани охиригача кўрган мухлисларнинг  ҳафсаласи пир бўлди. Бу саҳна кўринишидаги қаҳрамонлар орасида  қурбонлар бўлмади, ҳеч ким аламли кўз ёш тўкмагани етмагандек, асар сўнгида мақсадига етган томон ҳам ортиқча эмоцияларсиз саҳна кўринишига якун ясади...

Омадсиз якунланган спектакльда кўпчилик  айбни режиссёрдан қидириши аниқ. Маҳаллий йигитларни янги даражага олиб чиқиши кутилган ҳорижлик мутахассис жуда савиясиз  саҳна кўриниши эвазига ўз обрўсига путур етказиб қўйди… Асосийси, воқеалар ривожи биз учун ижобий якунланди. Ҳозирги ҳолатимизда бундан бошқа нарса билан ўзимизни овута олмаймиз.  Нима ҳам дер эдик…

Ҳазил ўз йўлига, бироқ танганинг иккинчи томони кўпчиликнинг эътиборидан ташқарида қолмоқда.  Таиландда бўлиб ўтадиган турнирга акаларининг шарофати билан «Амалдаги чемпионлар» унвони билан ташриф буюрадиган Олимпия терма жамоамизнинг йигитларидан бу тарзда фойдаланиш тўғримикан? Ўзбек футболида айнан шу иллатга қарши очиқчасига кураш бораётган бир пайтда бу томоша кўпчиликда шубҳа уйғотди.

Катта йўл олдида турган йигитларимиз шу ёшиданоқ футбол найрангларига аралашиб қолишмадими?  Балки, бу учрашув аслида бизга кўрингандек ўтмагандир, балки бизга шундай туюлгандир, яна ким билади дейсиз? Учрашув қандай ўтганини ҳамма кўрди ва ўзи учун хулоса чиқарди. Илоҳим, шубҳаларим хато бўлиб чиқсин. Акс ҳолда, бундай бошланган йўлнинг охири кўпинча  манзилга олиб бормайди.

Я.У