Бугун, 30 март куни Чимкент-Тошкент веломарафони бўлиб ўтди. Ўзбекистон Республикаси Жисмоний тарбия ва спорт вазирлиги, Ўзбекистон ҳамда Қозоғистон велосипед спорти федерациялари ташаббуси билан ташкил этилган мусобақа Қозоғистонда Ўзбекистон йили деб эълон қилинганлиги нишонлаш, икки давлат ўртасидаги дўстлик алоқаларини янада мустаҳкамлаш, туризмни ривожлантириш, велоспортни оммалаштириш ҳамда соғлом турмуш тарзини тарғиб қилиш мақсадида ўтказилди.
Веломарафонда 150 нафар қозоғистонлик ва 100 нафарга яқин ўзбекистонлик велосипедчилар Қозоғистоннинг Шимкент шаҳри ҳокимлигидан Тошкент шаҳридаги Қозоғистон элчихонасига қадар бўлган 130 километрлик масофани босиб ўтишди. Иштирокчиларга қулайлик яратиш мақсадида уларнинг йўлида яшил йўлак ташкил этилди.
Мусобақанинг финиш чизиғида барча иштирокчилар учун маданий дастур ташкил этилиб, ўзбек эстрадаси юлдузлари иштирокида концерт намойиш этилди. Тантанали тақдирлаш маросимида Қозоғистоннинг Ўзбекистондаги фавқулодда ва мухтор элчиси Дархан Сатибалди, Жисмоний тарбия ва спорт вазирининг биринчи ўринбосари Ойбек Қосимов, Тошкент шаҳри ҳокими ўринбосари Дилбар Нажмутдинова сўзга чиқиб, ушбу марафон ҳам икки давлат ўртасида дўстлик алоқаларининг янада мустаҳкамлашга, соғлом турмуш тарзини оммалаштиришга хизмат қилишини таъкидлаб, бу каби мусобақаларни анъанавий тарзда ўтказилишини маълум қилишди.
Веломарафонда маррага биринчи бўлиб қозоғистонлик Алексей Симеренок этиб келган бўлса, иккинчи ўринни англиялик Бетю Райт ва учинчи ўрин юртдошимиз Шохрух Юнусов қўлга киритди.
Марафонда иштирок этганларнинг кўпчилиги Ўзбекистон ва Қозоғистонлик велоспорт ишқибозлари бўлиб, энг ёши улуғ аёл иштирокчи сифатида 50 ёшли Светлана Исаева ва энг ёши катта эркак иштирокчи сифати 61 ёшли Хурсанд Шеров ҳам эсдалик совғалар билан тақдирланишди.