Мураббийлардан бирининг футболдан 5 йилга четлаштирилиши ва 50 миллион жаримага тортилиши масаласи 1 апрель куни эълон қилингани учун, изоҳларда бу ҳазил эмасми қабилидаги фикрлар кўп бўлди. Йўқ, бу ҳазил эмас. Ҳазил қилинганида ҳам кимнингдир шаъни, қадри ва қиммати билан ўйнашиб бўлмайди.

Ўша мураббий футболдан четлаштирилганига қарамай, бемалол юргани борасидаги сурат кўплаб эътирозларга сабаб бўлди. Бироқ ЎФА инспекцияси камида 1,5 ойдан буён бошқа масала устида суриштирув ўтказаётгани сабаб, бунга катта урғу берилмади. Чунки вазият деярли ойдинлашиб келаётганди.

Ким билан келишган, деган саволлар кўп. Суриштирув бу ишда тотализаторнинг роли каттароқ эканини кўрсатди. Яъни, 2 та гол фарқи билан мағлуб бўлиш юзасидан ўз футболчиларига кўрсатма бериш, футболчилар буни тасдиқлади. Бироқ иккинчи томон ёки ҳакамнинг бу масаладаги иштироки масаласи очилмади. Қинғир ишнинг қийиғи 40 йилда ҳам чиқади, балки қачондир бунга ҳам тўла ойдинлик киритиш мумкиндир. Ҳозир эса Этика қўмитаси айби исботланмаган томонни очиқ кўрсатиш этикага тўғри келмайди, деб ҳисоблаган бўлса керак.

Мураббий ким билан келишган, қандай келишган, бу ишнинг нархи қанча каби саволларга жавоб олиш жуда қийин. Буни тегишли органларсиз аниқлаш мураккаб. Бироқ факт шуки, ЎФА тарихда биринчи бор ўз шогирдларидан енгилиб беришни сўраган мураббий расман аниқланди. Демак, калаванинг учи бор.