Шу кунларда Туркиянинг Анталия шаҳрида дзюдо бўйича анъанавий “Гран-При” халқаро турнири давом этяпти. 75 давлатдан 485 нафар (297 эркак, 188 аёл) спортчи қатнашаётган нуфузли мусобақада юртимиз шарафини 7 нафар дзюдочимиз ҳимоя қилмоқда.
Турнирнинг биринчи кунида -60 кг вазн тоифасидаги баҳсларда ҳамюртимиз Кемран Нуруллаев татамига чиқди. Дастлабки босқичларда Хитой Таипейи, Туркия, Болгария ва озарбайжонлик номдор рақибларини мағлуб этган полвонимиз ярим финалда ўсмирлар ўртасида жаҳон чемпиони бўлган туркиялик Михрач Аккшдан устун келди.
Афсуски финалда спортчимизга бироз тажриба етишмади ва Рио олимпиадасининг кумуш медали соҳиби қозоғистонлик Елдос Сметовга имкониятни бой бериб қўйди. Шундай қилиб, Кемран Нуруллаев турнирнинг кумуш медали ҳамда Токио Олимпиадаси учун рейтинг очколарини қўлга киритди.
