Аввал хабар берганимиздек, Шри-Ланканинг Калутара шаҳрида шахмат бўйича 8 ёшдан 18 ёшгача бўлган ўғил-қизлар ўртасида навбатдаги Осиё чемпионати ўтказилди. Унда юртимиз шахматчилари ҳам иштирок этди.
Қитъа биринчилигида ўз ёш тоифаларида Ўзбекистон чемпионатларида юқори натижа кўрсатган ёш шахматчиларимиз Умида Омонова, Руқия Олимова, Афруза Ҳамдамова, Ҳумоюн Бегмуратов ва Абдималик Абдисалимов ватанимиз шарафини ҳимоя қилди.
Қувонарлиси, ёшларимиз Осиё чемпионатидан 5та олтин, иккита кумуш ва битта бронза медали билан қайтадиган бўлишди.
Бугун мусобақанинг стандарт йўналиши бўйича сўнгги 9-тур баҳслари ўтказилди. Унда 10 ёшгача бўлган шахматчилар ўртасида ҳамюртимиз Ҳумоюн Бекмуратов 8 очко жамғарди ва олтин медалга сазовор бўлди. Шу ёш тоифасида 2-ўрин ҳиндистонлик Маянк Чакрабортига, 3-ўрин эса эронлик Моваҳед Синага насиб этди. Эътиборлиси, Ҳумоюн ушбу мусобақанинг блиц баҳсларида ҳам олтин медални қўлга киритди.
Шу ёш тоифасида қизлар ўртасидаги баҳсларда ҳамюртимиз Афруза Ҳамдамова кумуш медаль билан тақдирланди. 9 имкониятдан 7 очко жамғарган ҳамюртимиз Осиё вице-чемпиони номига сазовор бўлди. Шунингдек, у мусобақанинг рапид йўналишида ҳам кумуш медални қўлга киритди.
Яқингинада мамлакатимиз тарихида FIDE устаси унвонини қўлга киритган энг ёш аёл шахматчига айланган Умида Омонова 14 ёшгача бўлган қизлар ўртасида юртимизга яна бир олтин медални тақдим этди. У 9 имкониятдан 7 очко жамғарди.
Омонованинг ғолибона юришини яна бир ҳамюртимиз Абдималик Абдисалимов давом эттирди. У 18 ёшгача бўлган ёшлар ўртасида олтин медалга сазовор бўлди. Абдисалимов Осиё чемпионатининг сўнгги турида оқ доналарда ўйнаб ҳиндистонлик рақибини мағлуб этди ва энг яқин таъқибчиси бўлган мезбон шахматчини ярим очкога ортда қолдирди. Ушбу мусобақада Абдималик рапид йўналишида ўтказилган турнирда ҳам олтин медалга сазовор бўлди.
