Пойтахтимиздаги “Ўзбекистон” спорт мажмуасида ўсмирлар ва ёшлар ўртасида ўзбек жанг санъати бўйича I Осиё очиқ чемпионати ўтказилди.
Ўзбекистон Республикаси Жисмоний тарбия ва спорт вазирлиги, мамлакатимиз ўзбек жанг санъати федерацияси томонидан ташкил этилган чемпионатда ҳамюртларимиздан ташқари Қозоғистон, Қирғизистон ва Тожкистон давлатидан келган 400 нафарга яқин спортчилар иштирок этди.
Кескин ва муросасиз ўтган беллашувларда Раҳматжон Аҳмаджонов, Абдуллох Қобулжонов, Камрон Нурмуҳаммедов, Сабина Соттиева, Зарина Соттиева, Мадина Асилова, Лайло Нобоева ғолиб ва совриндорлар қаторидан жой эгаллади.
– Илк маротаба ташкил этилган мазкур мусобақада шогирдларим муваффақиятли иштирок этди, – дейди Зуҳра Умурзоқова, – Ўзбек жанг санъати бўйича қўшни давлатларда шуғулланувчилар сони кўпаяётгани миллий спортимизнинг дунё бўйлаб ривожланаётганидан далолатдир. Чемпионатда Тошкент, Фарғона, Андижон, Бухоро ва Қозоғистондан келган спортчилар ўртасидаги баҳслар қизиқарли ўтди.
Чемпионат якунида ғолиб ва совриндорлар ташкилотчилар томонидан диплом ва эсдалик совғалари билан тақдирланди.