Poytaxtimizdagi “O‘zbekiston” sport majmuasida o‘smirlar va yoshlar o‘rtasida o‘zbek jang san’ati bo‘yicha I Osiyo ochiq chempionati o‘tkazildi.
O‘zbekiston Respublikasi Jismoniy tarbiya va sport vazirligi, mamlakatimiz o‘zbek jang san’ati federasiyasi tomonidan tashkil etilgan chempionatda hamyurtlarimizdan tashqari Qozog‘iston, Qirg‘iziston va Tojkiston davlatidan kelgan 400 nafarga yaqin sportchilar ishtirok etdi.
Keskin va murosasiz o‘tgan bellashuvlarda Rahmatjon Ahmadjonov, Abdullox Qobuljonov, Kamron Nurmuhammedov, Sabina Sottiyeva, Zarina Sottiyeva, Madina Asilova, Laylo Noboyeva g‘olib va sovrindorlar qatoridan joy egalladi.
– Ilk marotaba tashkil etilgan mazkur musobaqada shogirdlarim muvaffaqiyatli ishtirok etdi, – deydi Zuhra Umurzoqova, – O‘zbek jang san’ati bo‘yicha qo‘shni davlatlarda shug‘ullanuvchilar soni ko‘payayotgani milliy sportimizning dunyo bo‘ylab rivojlanayotganidan dalolatdir. Chempionatda Toshkent, Farg‘ona, Andijon, Buxoro va Qozog‘istondan kelgan sportchilar o‘rtasidagi bahslar qiziqarli o‘tdi.
Chempionat yakunida g‘olib va sovrindorlar tashkilotchilar tomonidan diplom va esdalik sovg‘alari bilan taqdirlandi.