Олий ва ўрта махсус таълим вазирлигида “Баркамол авлод-2019” ва “Универсиада-2019” спорт мусобақалари Республика финал босқичини юқори савияда ташкил этиш ва ўтказиш масалаларига бағишланган Ташкилий қўмита йиғилиши бўлиб ўтди.
Йиғилиш вазирлик идора ва ташкилотлар, ҳокимликлар иштирокида видоселектор тарзида ташкил этилди.
Йиғилишда кун тартибига қўйилган Ўзбекистон Республикаси Вазирлар Маҳкамасининг 2018 йил 25 октябрдаги “Ўқувчи ва талаба ёшлар ўртасида ўтказиладиган республика спорт мусобақалари тизимини янада такомиллаштириш тўғрисида”ги 864-сонли қарорида белгилаб берилган вазифалар ижроси таҳлил қилиниб, “Баркамол авлод-2019” ва “Универсиада-2019” спорт мусобақаларини Республика финал босқичини юқори савияда ташкил этиш ва ўтказиш чора-тадбирлари белгилаб олинди.
Йиғилишни Ташкилий қўмита раиси Олий ва ўрта махсус таълим вазири Иномжон Маджидов олиб борди.
Дастлаб Ўзбекистон Республикаси Вазирлар Маҳкамасининг 2018 йил 25 октябрдаги “Ўқувчи ва талаба ёшлари ўртасида ўтказиладиган республика спорт мусобақалари тизимини янада такомиллаштириш тўғрисида”ги 864-сонли қарорида белгилаб берилган вазифаларнинг бажарилиши тўғрисида Жисмоний тарбия ва спорт вазири ўринбосари Шарифжон Мўминжонов маърузаси тингланди.
Шунингдек, йиғилишда Ташкилий қўмита маъсул котиби, Ўзбекистон талабалар спорти ассоциацияси раисининг биринчи ўринбосари Эркин Қодиров ва “Баркамол авлод-2019” ва “Универсиада-2019” спорт мусобақаларини Республика финал босқичини юқори савияда ташкил этиш ва ўтказиш билан боғлиқ сарф-харажатларни молиялаштириш масалалари юзасидан Олий ва ўрта махсус таълим вазирлиги Молиялаштириш ва бухгалтерия ҳисоби бошқармаси бошлиғи М.Ҳамраев ҳам сўзга чиқдилар.
Кун тартибига қўйилган масалалар атрофлича муҳокама қилиниб, мутасадди вазирлик, идора ва ҳокимлик раҳбарларининг таклифларини инобатга олиб, Ташкилий қўмита томонидан тегишли қарор қабул қилинди. Унга кўра, Касб-ҳунар коллежлари ўқувчи ёшлари ўртасида “Баркамол авлод-2019”, олий таълим муассасалари талабалари ўртасида “Универсиада-2019” спорт мусобақаларининг Республика финал босқичи ҳар йили спорт турлари бўйича навбатма-навбат, республиканинг барча ҳудудларида ўтказилиши, мазкур мусобақаларни юқори савияда ўтказиш учун Тошкент шаҳрида Республика Штабини ташкил этиш ва Ўзбекистон талабалар спорти Ассоциациясига бириктириш белгиланди.
Қарор билан “Баркамол авлод-2019” ва “Универсида-2019” спорт мусобақаларининг рамзлари, рамзлари таснифи ва рамзлар тўғрисидаги Низомлар, “Баркамол авлод-2019” ва “Универсиада-2019” спорт мусобақаларининг республика финал босқичида иштирок этадиган ҳудудий терма жамоалар таркиби, “Баркамол авлод-2019” ва “Универсиада-2019” спорт мусобақаларининг республика финал босқичини ўтказиш жадвали, “Баркамол авлод-2019” ва “Универсиада-2019” спорт мусобақаларининг республика финал босқичини ўтказиш тақвим режалари, “Баркамол авлод-2019” ва “Универсиада-2019” спорт мусобақаларининг республика финал босқичини молиялаштириш сарф-харажатлари сметаси, тегишли иловаларга мувофиқ тасдиқланди.
Шунингдек, барча мутасадди вазирлик, идора ва ташкилотлар, ҳокимликлар зиммасига “Баркамол авлод-2019” ва “Универсиада-2019” спорт мусобақаларининг Республика финал босқичларини юқори савияда ташкил этиш ва ўтказиш юзасидан бир қатор тегишли вазифалар юкланди.
