Англия чемпионатининг 37-тури доирасида «Манчестер Юнайтед» клуби аллақачон Чемпионшипга тушиб кетган «Хаддерсфилд» меҳмони бўлиб, кутилмаганда, очко йўқотди. Натижада Сульшер жамоасининг ушбу мавсумда кучли тўртликка кира олмаслиги аниқ бўлди.

Манкунианликлар бугунги баҳсни жуда яхши бошлашганди. Ўйиннинг 8-дақиқасида Скотт Мактомини ҳисобни очишга муваффақ бўлди. Меҳмонлар танаффусга қадар ўйин тақдирини ҳал қилиб қўйишлари мумкин эди. Баҳснинг 25-дақиқасида Мата қулай вазиятдан зарба беришда бироз адашган бўлса, Погбанинг бош билан берган зарбасидан кейин тўп тўсинга тегиб қайтди.

Иккинчи бўлимда эса «Хаддерсфилд» темпни бироз оширди ва ҳисобни тенглаштиришга муваффақ бўлди. Ўйиннинг 60-дақиқасида "МЮ" бурчак тўпини ўйинга киритдию, аммо майдон эгалари қарши ҳужумга қочиб кетиб, Исаак Мбенза ҳисобни тенглаштирди.

Сульшер шогирдлари ғалабани ўз томонларига оғдириш учун ҳаракат қилишди, аммо уларга гол уриш бошқа насиб этмади.

Шу тариқа, "МЮ" мавсум тугашига 1 тур қолганида ЕЧЛ йўлланмасидан маҳрум бўлди.

Англия премьер-лигаси, 37-тур
Хаддерсфилд – Манчестер Юнайтед 1:1 (0:1, 1:0)
Голлар: 0:1 – 8 Мактомини, 1:1 – 60 Мбенза.
Хаддерсфилд – Лессль, Конголо, Дурм (Смит, 46), Шиндлер, Леве, Муй, Бакуна, Притчард, Хогг, Мбенза (Диакаби, 90), Грант.
Манчестер Юнайтед – Де Хеа, Шоу, Линделеф (Диогу Далот, 83), Жонс, Янг, Погба, Матич (Эррера, 53), Мата, Мактомини, Санчес (Чонг, 54), Рэшфорд.
Огоҳлантиришлар: Жонс (33), Лессль (90).