Angliya chempionatining 37-turi doirasida «Manchester Yunayted» klubi allaqachon Chempionshipga tushib ketgan «Xaddersfild» mehmoni bo‘lib, kutilmaganda, ochko yo‘qotdi. Natijada Sulsher jamoasining ushbu mavsumda kuchli to‘rtlikka kira olmasligi aniq bo‘ldi.

Mankunianliklar bugungi bahsni juda yaxshi boshlashgandi. O‘yinning 8-daqiqasida Skott Maktomini hisobni ochishga muvaffaq bo‘ldi. Mehmonlar tanaffusga qadar o‘yin taqdirini hal qilib qo‘yishlari mumkin edi. Bahsning 25-daqiqasida Mata qulay vaziyatdan zarba berishda biroz adashgan bo‘lsa, Pogbaning bosh bilan bergan zarbasidan keyin to‘p to‘singa tegib qaytdi.

Ikkinchi bo‘limda esa «Xaddersfild» tempni biroz oshirdi va hisobni tenglashtirishga muvaffaq bo‘ldi. O‘yinning 60-daqiqasida "MYU" burchak to‘pini o‘yinga kiritdiyu, ammo maydon egalari qarshi hujumga qochib ketib, Isaak Mbenza hisobni tenglashtirdi.

Sulsher shogirdlari g‘alabani o‘z tomonlariga og‘dirish uchun harakat qilishdi, ammo ularga gol urish boshqa nasib etmadi.

Shu tariqa, "MYU" mavsum tugashiga 1 tur qolganida YECHL yo‘llanmasidan mahrum bo‘ldi.

Angliya premyer-ligasi, 37-tur
Xaddersfild – Manchester Yunayted 1:1 (0:1, 1:0)
Gollar: 0:1 – 8 Maktomini, 1:1 – 60 Mbenza.
Xaddersfild – Lessl, Kongolo, Durm (Smit, 46), Shindler, Leve, Muy, Bakuna, Pritchard, Xogg, Mbenza (Diakabi, 90), Grant.
Manchester Yunayted – De Xea, Shou, Lindelef (Diogu Dalot, 83), Jons, Yang, Pogba, Matich (Errera, 53), Mata, Maktomini, Sanches (Chong, 54), Reshford.
Ogohlantirishlar: Jons (33), Lessl (90).