ОЧЛ 5-туридан ўрин олган "Ал Ваҳда" - "Локомотив" баҳси олдидан матбуот анжумани ўтказилди. Бунда дастлаб "Локомотив" бош мураббийи Андрей Фёдоров ва жамоа ярим ҳимоячиси Азизбек Ҳайдаров иштирок этиб, ОАВ саволларига жавоб қайтаришди.

А.Фёдоров: - Авваламбор барчани Рамазон ойи билан муборакбод этаман. Эртанги ўйин ҳақида гапирадиган бўлсам, биз ғалаба учун бор кучимизни берамиз. Турнир жадвалидан келиб чиққан ҳолда йўқотадиган ҳеч нарсамиз қолмади ва эртага фақат ғалаба учун ўйнаймиз. Мен "Ал Ваҳда" бизга қарши қандай ўйин намойиш этиши ҳақида гапира олмайман, фақат ўз жамоам ҳақида фикр билдиришим мумкин. Рақиб гуруҳда биринчи ўринда кетяпти, бу эса уларнинг кучидан дарак беради. Лекин эртага биз ҳам уч очколи бўлишга ҳаракат қиламиз.

А.Ҳайдаров: - Яна БААда бўлиб турганимдан хурсандман. Ўз пайтида "Ал Ваҳда"га қарши кўплаб ўйинларда иштирок этганман ва бу жамоани жуда яхши биламан. Бу жамоага қарши Президент Кубоги, БАА Пролигаси доирасида ўйинлар ўтказганман. "Ал Ваҳда" доим кучли жамоа сифатида ҳаракат қилган, аммо биз ҳам эртага қараб турмаймиз. Худди Тошкентда бўлгани каби бу ерда ҳам рақибни мағлуб этишга ҳаракат қиламиз. Бунинг учун бизда имконият етарли деб ўйлайман.