OCHL 5-turidan o‘rin olgan "Al Vahda" - "Lokomotiv" bahsi oldidan matbuot anjumani o‘tkazildi. Bunda dastlab "Lokomotiv" bosh murabbiyi Andrey Fyodorov va jamoa yarim himoyachisi Azizbek Haydarov ishtirok etib, OAV savollariga javob qaytarishdi.
A.Fyodorov: - Avvalambor barchani Ramazon oyi bilan muborakbod etaman. Ertangi o‘yin haqida gapiradigan bo‘lsam, biz g‘alaba uchun bor kuchimizni beramiz. Turnir jadvalidan kelib chiqqan holda yo‘qotadigan hech narsamiz qolmadi va ertaga faqat g‘alaba uchun o‘ynaymiz. Men "Al Vahda" bizga qarshi qanday o‘yin namoyish etishi haqida gapira olmayman, faqat o‘z jamoam haqida fikr bildirishim mumkin. Raqib guruhda birinchi o‘rinda ketyapti, bu esa ularning kuchidan darak beradi. Lekin ertaga biz ham uch ochkoli bo‘lishga harakat qilamiz.
A.Haydarov: - Yana BAAda bo‘lib turganimdan xursandman. O‘z paytida "Al Vahda"ga qarshi ko‘plab o‘yinlarda ishtirok etganman va bu jamoani juda yaxshi bilaman. Bu jamoaga qarshi Prezident Kubogi, BAA Proligasi doirasida o‘yinlar o‘tkazganman. "Al Vahda" doim kuchli jamoa sifatida harakat qilgan, ammo biz ham ertaga qarab turmaymiz. Xuddi Toshkentda bo‘lgani kabi bu yerda ham raqibni mag‘lub etishga harakat qilamiz. Buning uchun bizda imkoniyat yetarli deb o‘ylayman.
