Ўзбекистон Профессионал футбол лигаси соғлом ҳаёт тарзи учун курашаётган болаларни қўллаб-қувватлаш мақсадида “Саратондан соябон бўл” номли хайрия акциясини бошлаганидан хабарингиз бор.
“Динамо” футбол клуби ҳам ушбу акцияга қўшилди. Клуб вакиллари ва футболчилар Самарқанд вилоят онкология диспансерида бўлиб, бемор болажонлар ҳолидан хабар олишди.
Мақсад – жамиятнинг эътиборини ушбу муаммога жалб қилиб, кичкинтойлар, катталар, шифокорлар ва бировнинг қайғусига бефарқ бўлмаган инсонларнинг биргаликдаги ҳакаратлар билан саратон касаллиги устидан ғалаба қозониш мумкинлигини намойиш қилишдан иборат.
Таъкидлаш жоиз, Суперлиганинг 9 ва 10-тур беллашувларида жамоалар мазкур акция доирасида қатор тадбирларда иштирок этади. Саратонни енгиб ўтиш каби машаққат билан курашаётган жажжи қалбларни футбол мухлислари ҳам қўллаб-қувватлашлари мумкин. Кейинги турлар давомида ҳар бир стадионга хайрия қутилари ўрнатилади. Уларда йиғилган маблағлар эса ўша ҳудуддаги онкология марказларига ўтказиб берилади.
