Бухоро шаҳридаги “Бухоро спорт мажмуаси”да енгил атлетика бўйича 2002-2003 йилларда туғилган ўғил ва қизлар ўртасида Республика чемпионати бўлиб ўтди.
Мамлакат биринчилигида республикамизнинг барча ҳудудларидан ташриф буюрган 340 нафар (шундан 100 нафари қизлар )ёш спортчилар енгил атлетиканинг турли йўналишлари бўйича икки гуруҳга бўлиниб куч синашишди. Яъни биринчи гуруҳ спортчилари 16 ёшгача бўлганлардан ташкил топган бўлса, иккинчи гуруҳ 18 ёшли ўғил-қизларни қамраб олди.
Икки кун давом этган чемпионатда биринчи гуруҳда жамғарилган медаллар сони бўйича сурхондарёлик ёшлар етакчилик қилган бўлса, кейинги ўринлар Сирдарё ва навоийлик атлетларга насиб этди.
18 ёшлилар ўртасидаги баҳсларда эса Самарқанд вилояти вакиллари энг кўп медаль жамғаришди. Шунингдек, ушбу ёш тоифасида Фарғона ва Тошкент вилоятидан ташриф буюрган йигит-қизлар энг яхши натижани қайд этишди.
Мусобақа ғолиб ва совриндорлари дипломлар билан тақдирланишди.
