"Арсенал" клуби жамоа яримҳимоячиси Генрих Мхитаряннинг Европа лигаси финалида "Челси"га қарши майдонга тушмаслигини расман эълон қилди.

"Генрих Мхитаряннинг жамоа билан Европа лигаси финалига бормаслигидан жуда хафамиз.

Биз барча вариантларни диқаат билан ўрганиб чиқдик, аммо Мики ва унинг оиласи билан муҳокма қилганимиздан сўнг у жамоа билан Бокуга бормаслиги борасида бир қарорга келдик.

Биз бу борада УЕФАга маълум қилдик. Мики финалгача бўлган йўлимизда ҳал қилувчи ролни ўйнаган эди, жамоа нуқтаи назаридан бу катта йўқотиш.

Биз афсусдамиз - шундай ўйинчи бу каби вазиятда жуда муҳим ўйинни - еврокубок финалини ўтказиб юборади. Бундай ҳолатлар футболчи фаолиятида жуда кам учрайди.

Мики жамоа машғулотларида қатнашишда давом этмоқда", - дейилади баёнотда.

Эслатиб ўтамиз, Тоғли Қорабоғ ҳудуди сабабли Озарбойжон ва Арманистон ўртасида муносабатлар ёмон. Мхитарян мустақил, аммо юридик жиҳатдан Озарбойжонга тегишли бўлган бу ҳудудга ташриф буюрган.

Мхитарян шу сабаб билан аввалроқ Европа лигасида "Қорабоғ" билан ўйинни ўтказиб юборган. 2015 йилда "Габала" билан ўйинга ҳам бормаган.