“Локомотив” – “Ал Райян” учрашуви якунланганидан кейинги матбуот анжуманида “темирйулчилар” бош мураббийи Андрей Фёдоров ҳамда учрашувнинг энг яхши футболчиси Тимурхўжа Абдухолиқов иштирок этди.

– Биринчи навбатда “Локомотив”нинг барча мухлисларини ғалаба билан табриклайман. Ҳозирги ҳолатда бу ўйин бизга ҳеч нима бермасди, буни кеча ҳам таъкидлагандим. Оз бўлсада мухлислар келганига раҳмат. Кеча менга бу ўйин деярли ўртоқлик мақомида ўтишини ва қандай қилиб футболчиларга иштиёқ беришимни айтишганди.

Бу ўртоқлик ўйини эмас! ОЧЛ ўйинлари кўп бўлмайди. Ҳа, ўйин жуда ёмон бошланди. Маъмурнинг бу хатосини унинг ўйин амалиёти камлиги билан боғлаган бўлардим. Асосийси, таслим бўлмадик ва асабийлашмасликка интилдик. Танаффусда футболчиларга хотиржам бўлиш кераклигини айтдим. Иккинчи бўлим бошидан, балки бутун бир тайм давомида ўйинни назорат қилдик ва ҳужумларни ажойиб якунлай олдик. Бу эса ғалабага олиб келди. Йигитларнинг ғалабага чанқоқлиги юқори эди.

Ҳа, бунга қадар кўплаб хатоларга йул қўйдик. Ғалаба 3 очкодан бошқа ҳеч нима бермаслигини барча билса ҳам, футболчиларга ғалаба қозониш шарт эканлигини ва ўзимизни йуқотиб қўймаслигимизни, Ҳар доимгидек ўйнаш кераклигини тушунтирдим. Айта оламанки, бугун камроқ хато қилдик.

Тимурхўжа Абдухолиқов: – Тўғри, ғалаба ҳеч нимани ҳал қилмасди. Аммо ғалаба ҳар доим яхши ҳиссиётлар беради. Ўйинга келадиган бўлсам, 2:0дан кейин уйғондик, қайтишга ҳаракат қилдик. Унга қадар биз концентрацини йуқотиб қўйдик. Албатта, кейинчалик ўзимизга келиб, кетма кет голлар урдик.

– ОЧЛнинг ушбу мавсумида 5та гол урдингиз. Хўш, халқаро майдондаги ўйинингиздан қониқдингизми?

5та гол урасизми, 10та урасизми бунинг фарқи йуқ. Гуруҳдан чиқиш керак эди. 2016 йилда 3та гол урган бўлсак ҳам, гуруҳдан чиққандик. Бу мавсум эса вазифа бажарилмади.