Ўзбекистон ва Сурия ўртасида ўтказилган ўртоқлик учрашувидан сўнг терма жамоамиз ярим ҳимоячиси Остон Урунов сайтимиз учун қисқа интервью берди.
Остон авваламбор ғалаба муборак. Учрашув ҳақида фикрингиз, ўйин қандай ўтди?
- Ўйин яхши бўлди деб ўйлайман. Мураббийнинг кўрсатмаларини аниқ амалга ошириб ажойиб ўйин кўрсатдик. Стадиондаги муҳит ҳам ўйинга яраша бўлди.Бундай муҳит яратиб бергани учун мухлисларга катта раҳмат.
Эктор Купер бошчилигидаги терма жамоага илк марта чақирилдингиз. Эктор Купер ҳақида қандай фикрдасиз?
- Купер жуда ажойиб инсон. Футболчиларнинг кўнглига жуда тез йўл топа олади. У футболчилар ҳар томонлама мукаммал бўлишини хоҳлайди. Мураббийлик фаолиятига келадиган бўлсак, ҳаммаси ажойиб . Бу йиғинда ўзим учун кўп нарсалар ўргандим.
Эктор Купер билан ЖЧ-2022га чиқа оламизми?
- Ҳа, Худо хоҳласа чиқамиз. Биз футболчилар ҳам бунинг учун боримизни бериб ҳаракат қиламиз.
“Миллий” стадионнинг чими янгилангандан сўнг иккита ўйин ўтказилди. Сизнингча, стадионнинг майсаси бундай ўйинларга тайёрмиди?
- Майдон чимини яхши демаган бўлардим. Майдоннинг чими сабабли кеча учрашувнинг бошида дарвозага зарба бераман деб жароҳат олдим ва шу тариқа ўйинни жароҳат билан ўтказишга мажбур бўлдим.
Жалолиддин Қобилжонов ёзиб олди.
