«Реал» бош мураббийи Зайниддин Зидан Intertational Champions Cup мусобақаси доирасида бўлиб ўтган «Бавария»га қарши ўйиндан (1:3) кейин ярим ҳимоячи Гарет Бэйлнинг келажаги борасида ўз фикрини билдириб ўтди.

«Бэйл жамоани тарк этишга яқин турибди. Шу боис, у бугунги ўйинда иштирок этмади. Умид қиламан, тез орада у бошқа жамоага ўтади. Бу барча учун энг яхши қарор бўлади. Биз уни бошқа жамоага трансфер қилиш устида ишлаяпмиз.

Унга нисбатан шахсий ғаразим йўқ, аммо шундай қилиш вақти келди. Мен қарор қабул қилишим керак. Жамоада ўзгариш қилишим лозим.

Унинг жамоани тарк этиши — бу нафақат мураббийнинг қарори, балки футболчининг ўзи ҳам шундай қарорга келди. У вазиятни яхши англаб турибди. Бир-икки кунда вазият ўзгаради. Бу барча учун яхши вазият», — деди Зидан.

Аввалроқ «Реал» Бэйлни 80 млн еврога сотишга рози бўлгани ҳақида хабар тарқатганди.