Таиланднинг Бангкок шаҳрида бокс бўйича “Қирол кубоги” халқаро мусобақаси ўз якунига етиб бормоқда. Бироз аввал мусобақанинг дастлабки финал беллашуви ўтказилди.
Энг енгил -49 килограмм вазн тоифасида рингга чиққан юртдошимиз Нодиржон Мирзаҳмедов олтин медаль учун ҳиндистонлик Дипакка қарши жанг олиб борди ва худди 3 ой муқаддам Осиё чемпионатининг финалида бўлгани каби бу гал ҳам зафар қучди. Шунингдек, боксчимиз олтин медаль қаторида ташкилотчилар томонидан 1500 АҚШ доллари миқдоридаги пул мукофотига ҳам эга бўлади.
Эслатиб ўтамиз, кеча -75 килограмм вазн тоифасида Фанат Қаҳрамонов ярим финалда имкониятни бой бериб, бронза медали билан кифояланган эди. Шу тариқа терма жамоамиз мазкур мусобақани 1 тадан олтин ва бронза медаллари билан якунламоқда.
