«Реал Мадрид»нинг йирик ҳисобдаги мағлубияти футбол оммаси томонидан кенг муҳокама қилинмоқда. Бу борада «Реал Мадрид»нинг собиқ футболчиси Роналду ҳам четда қолмади. Италиянинг «Туттоспорт» нашри Роналду билан кичик интервьюни ташкил этди. Бундан ташқари, кечаги учрашувнинг қаҳрамони Диего Коста ҳам «Атлетико Мадрид» расмий сайти учун интервью берди. Биз эса бу интервьюларни сизларга тақдим этиш учун жамладик.

Диего Коста

Мен бундай йирик ҳисобдаги ғалабадан жуда ҳурсандман. Айниқса, бу ғалабага ҳисса қўшганимдан бахтиёрман. Тўғри, мен азалий рақибларимиз дарвозасига 5 та гол киритганимдан ҳурсандман, лекин унутмаслик лозим, бу ўртоқлик учрашуви эди. Расмий учрашувларда ҳаммаси бошқача бўлиши ҳам мумкин эди. Ҳозирда «Атлетико Мадрид» «Реал Мадрид» дан устунроқ. Биз янги мавсумда Мадридда ким биринчи рақамли жамоа эканлигини исботлаш учун бор кучимизни сарфлаймиз.
Четлатилишим борасида ортиқча сўзлашнинг хожати йўқ. Сабаби, мен қизил карточка олган бўлсамда, майдондаги футболчиларнинг сони тенг эди. Футбол - бу ҳиссиёт! Баъзан уни ушлаб қолишнинг иложи йўқ. Шундай экан, мени бу ишим учун кечиришларини сўраб қоламан.

Серҳио Рамос

Жуда ҳам ёқимсиз ҳислар, лекин биз мавсумни эндигина бошлаяпмиз. Бу ўртоқлик учрашуви бўлсада, «Атлетико Мадрид» ўйинга бошқача кайфиятда тушиб келди. Тўғри, жуда йирик ҳисобда мағлуб бўлдик. Буни тан оламан. Энг қувонарлиси биз танаффусда биринчи бўлимни унутиб иккинчи 45 дақиқаликда ғалаба қозониш учун ҳаркат қилдик ва буни уддасидан чиқдик. Шундай бўлсада, ўзимизни оқламоқчи эмасман. Кўпчилик бизда мотивация қолмаган деб ўйламоқда. Ҳеч ҳам бундай эмас. Ўтган мавсумдаги омадсизликдан сўнг ҳаммасини бошидан бошлашга қарор қилдик.  Мен ўз жамоамга тўлиқ ишонаман. Агарда заррача шубҳам бўлганида биринчилардан бўлиб «Реал Мадрид»ни тарк этган бўлар эдим.

Роналду

«Реал Мадрид»нинг «Атлетико»га қарши ўйинда кўрсатган ўйини мен кўрган энг ёмон учрашувлардан бири бўлди. Сиз тасаввур қиляпсизми? Бир учрашувнинг ўзида 7 та тўп олиб чиқдингиз! Бу «қироллик клуби» даражасидаги жамоа учун жуда ҳунук натижа! Мени «Реал Мадрид» сафида бўлган пайтим мавсум олди ўйинлардаги қониқарсиз натижамиз учун кескин танқид қилишар эди. Баъзан кўп гол ўтказиб юборганимиз учун бизга босим уюштиришар эди. Эндиликда ҳар бир жамоа «Реал Мадрид»га қарши алоҳида тайёргарлик билан майдонга тушмоқда. «Қаймоқранглилар» эса, тўп учун югуришни ҳам исташмаяпти. Клуб раҳбарлари ва Зидан бу борада чора кўриши шарт!Акс ҳолда «Реал Мадрид» аввалги даражасига ҳеч қачон чиқа олмайди.