Трансфер эвазига жамоага келиб қўшиладиган футболчиларнинг барчаси ҳам ишончни оқлайвермаслиги ҳеч кимга сир эмас. Бугун ана шундай омадсиз трансферлар эвазига футболчидан қутила олмаётган клублар ва кераксизга айланган футболчилар ҳақида сўз боради
Маркос Рохо
Аргентиналик ҳимоячи «Манчестер Юнайтед» сафига 25 миллион евро эвазига келиб қўшилганида, кўплаб мухлислар «қизил иблислар» омадли трансферни амалга оширди деб ҳисоблаган эди. Афсуски, орадан 5 йил ўтиб шуниси аёнки, Рохонинг трансфери деярли ўзини оқлаганича йўқ. Тўгри, футболчи янги жамоадаги илк мавсумларида асосий таркибда майдонга тушди, бироқ деярли ҳеч нарсани исботлай олмади. Ҳозирда Сулшер унинг ҳизматларига эҳтиёж сезмаётганини очиқчасига эълон қилган бўлсада, футболчининг клубда қолишдан бошқа чораси йўқ, сабаби уни ҳарид қилишни истаган бирорта клуб топилмади. Оқибатда, Рохо катта эҳтимол билан янги мавсумни заҳира ўриндиғида ўтказади.
Мангала
«Порту»дагаи ажойиб ўйинлари сабабли 2014-йилда «Манчестер Сити» сафига ўтган ҳимоячидан мухлисларнинг умиди катта эди. Гавда билан яхши ўйнайдиган, жисмонан бақувват ва тезкор ҳимоячи Пелегрини даврида асосий таркиб футболчисига айланган бўлсада, Гвардиоланинг келиши унинг кариерасини тубдан ўзгартириб юборди. Испаниялик мутахассис Мангалага деярли ўйнаш имконини қолдирмади. Футболчи аввалига «Валенция», «Эвертон» сингари клубларда ижара асосида тўп сурган бўлса, кейинчалик «шаҳарликлар»нинг иккинчи жамоасига ўтказиб юборилди. Футболчи ҳозирда ўзининг формасини тиклашга урунмоқда. Афсуски, «Ман Сити» уни деярли унутиб ҳам юборган. Мангала ҳозирда фақат қоғоздагина Гвардиоланинг шогирди ҳисобланади. Аслида, қаҳрамонимиз бу мутаббий қўл остида бирорта расмий учрашувда майдонга тушганича йўқ. Футболчи қанчалар бошқа клубга ўтишни истамасин, бирорта клуб Мангала билан шартнома тузишни истамаяпти.
Жо Ҳарт
Гвардиола томонидан «синдирилган» яна бир футболчи. Ҳарт испаниялик мутахассис келгунигақадар 8 йил давомида клубнинг биринчи рақамли дарвозабони эди. Бундан ташқари мухлисларнинг энг ёқимтойи ҳам эди десак, адашмаган бўламиз.
Гвардиола футболчини оёқ билан ўйнай олмагани учунгина ўз ҳисобидан чиқаради ва Жо учун ижаралар кетма-кетлиги бошланади. Аввалига «Вест Ҳем» сўнгра «Торино». Хатто «Бёрнли» жамоаси шарафини ҳимоя қилган дарвозабон рақобатда Том Ҳиттонга ютқазиб қўйди. Ҳозирда клубнинг иккинчи дарвозабони саналадиган Жо ўз даражасига бошқа қайта олмади. Ҳозирда ҳеч кимга кераги бўлмаган дарвозабон учун иккита вариант қолди. Биринчиси, «Чемпионшип» клубларидан бирида тўп суриш бўлса, иккинчиси катта маош тўланадиган Хитой клубларидан бирига ўтиш. Ҳозирча АПЛ клубларидан ҳеч бири уни ўз сафига қўшиб олишни истамаяпти.
Жером Боатенг
2014-йилдаги мундиалда ғолиб чиққан марказий ҳимоячи ўзининг ақлбовар қилмас ўйинлари билан кўлаб грандларнинг эътиборини тортган эди. Мюнҳен клубидаги иштироки билан дунёнинг энг кучли универсал ҳимоячиларидан бири сифатида тан олинган футболчининг ўйини бирдан пасайиб кетди. Бирин-кетин олинган жароҳатлар боис футболчи катта футболдан четда қола бошлади. Оқибатда, унинг трансфер қиймати ҳам сезиларли даражада пастлади. Ўзининг 30 ёшида «Бавария»га кераксиз бўлиб қолганини англаган Жером бошқа жамоага ўтиши ҳақида расман баёнот берган бўлсада, бирорта клуб жаҳон чемпионини ўз сафига қўшиб олишни истамади. Нико Ковач қўл остидаги «Бавария»да эса, унга жой топилмаётганига анча бўлди. Шундай экан, яна бир иқтидорли футболчи боши берк кўчага кириб қолди десак, адашмаган бўламиз.
Гонасало Игуаин
Турин супер клуби учун чинакам бошоғриққа айланган футболчи ҳақида тўхталиб ўтмасак бўлмас эди.
Гап шундаки, «Ювентус» аргентиналик футболчи учун клубни тарк этиши эвазига 5 миллион евро ваъда қилган бўлсада, футболчи жамоада қолишга қарор қилди ва кўплаб мухлисларнинг ғазабини қўзғатди. Айнан унинг қайсарлиги боис «Ювентус» Мойзе Кинни қўйиб юборишга мажбур бўлди ва туринликлар жуда иқтидорли футболчидан бироз фурсатга айрилишди. Ҳозирда 32 ёшдаги футболчининг жисмоний ҳолати ҳавас қилса бўладиган ҳолатда эмас. Ижара асосида«Челси», «Милан» сингари жамоаларда омадсиз тўп сурган футболчи ўз кариерасига каттагина доғ тушириб қўйди.
