«ПСЖ» ўйинчилари бош мураббий Томас Тухелнинг фаолиятидан қониқиш ҳосил қилмаяпти. Уларнинг фикрича, мутахассис методика ва таркиб танлашда кучли эмас, дея хабар тарқатди Le Parisien нашри.

Франция чемпионатининг 2-турида бўлиб ўтган «Ренн»га қарши ўйинда (1:2) Юлиан Дракслернинг майдонга туширилиши футболчиларга ёқмади. Боиси, у «Ним»га қарши ўтказилган 1-тур баҳсида (3:0) ёмон ўйин кўрсатган эди.

Бундан ташқари, ўйинчилар, жумладан, ярим ҳимоячи Марко Верратти Тухелнинг тактик қароридан ҳайрон бўлган. Италиялик футболчининг фикрича, «Ренн»га қарши ўйинда мураббий ярим ҳимоя ва ҳужум чизиғи ўртасидаги боғламларни йўлга қўйиш учун ҳеч қандай чора қўлламаган.

Германиялик мутахассиснинг машғулоти кўпроқ ҳимоявий ўйинга қаратилгани «ПСЖ» футболчиларига ёқмаяпти. Уларнинг фикрича, умумий тактикага, ҳужумкор ўйин стратегиясига, шунингдек, ўйинчилар орасидаги комбинацияга етарлича эътибор берилмаяпти. Парижликларнинг баъзи футболчилари Тухелнинг тактикаси «Неймарга узатма бер» билан чекланиб қолган, дея ҳисоблайди.

Манбага кўра, «Ренн»га қарши ўйиндан кейин «ПСЖ» футболчиларидан бири жамоадошидан: «Биз бугун қандай тактикада ўйнаганимизни тушундингми?», дея сўраган бўлса, унинг шериги: «Йўқ. Ҳар доимгидек», дея жавоб берган.