«PSJ» o‘yinchilari bosh murabbiy Tomas Tuxelning faoliyatidan qoniqish hosil qilmayapti. Ularning fikricha, mutaxassis metodika va tarkib tanlashda kuchli emas, deya xabar tarqatdi Le Parisien nashri.

Fransiya chempionatining 2-turida bo‘lib o‘tgan «Renn»ga qarshi o‘yinda (1:2) Yulian Drakslerning maydonga tushirilishi futbolchilarga yoqmadi. Boisi, u «Nim»ga qarshi o‘tkazilgan 1-tur bahsida (3:0) yomon o‘yin ko‘rsatgan edi.

Bundan tashqari, o‘yinchilar, jumladan, yarim himoyachi Marko Verratti Tuxelning taktik qaroridan hayron bo‘lgan. Italiyalik futbolchining fikricha, «Renn»ga qarshi o‘yinda murabbiy yarim himoya va hujum chizig‘i o‘rtasidagi bog‘lamlarni yo‘lga qo‘yish uchun hech qanday chora qo‘llamagan.

Germaniyalik mutaxassisning mashg‘uloti ko‘proq himoyaviy o‘yinga qaratilgani «PSJ» futbolchilariga yoqmayapti. Ularning fikricha, umumiy taktikaga, hujumkor o‘yin strategiyasiga, shuningdek, o‘yinchilar orasidagi kombinasiyaga yetarlicha e’tibor berilmayapti. Parijliklarning ba’zi futbolchilari Tuxelning taktikasi «Neymarga uzatma ber» bilan cheklanib qolgan, deya hisoblaydi.

Manbaga ko‘ra, «Renn»ga qarshi o‘yindan keyin «PSJ» futbolchilaridan biri jamoadoshidan: «Biz bugun qanday taktikada o‘ynaganimizni tushundingmi?», deya so‘ragan bo‘lsa, uning sherigi: «Yo‘q. Har doimgidek», deya javob bergan.