"Локомотив" - "Металлург" ўйинидан кейин ўтказилган матбуот анжуманининг иккинчи қисмида мезбонлар бош мураббийи Самвел Бабаян иштирок этди.

— "Локомотив" учун барча ўйинлар оғир кечаяпти. Ҳамма рақибларимизга бизга қарши сўнгги ўйинга чиқаётгандек тайёрланишади, назаримда. Қимматли очколарни бой бераётганимизда ўзимизнинг ҳам айбимиз бор. Захира ўриндиғимизда кучлар билан рақибни мағлуб эта олмаяпмиз. Бугун икки хил тайм ўтказдик. Биринчи таймда тўпни назорат қилдик. Ҳисобни очдик, вазиятларга эга бўлдик. Аммо иккинчи таймда негадир ўйинимизни йўқотиб қўйдик. Бундан ташқари терма жамоаларга чақирилган футболчиларимиз турлича ҳолатларда етиб келишди. Танаффус пайтида футболчиларга охиригача курашиш лозимлигини уқтиргандик. Афсуски, улар кўрсатмаларни мукаммал бажара олишмади. Натижада қимматли очколардан маҳрум бўлдик. Бу учрашув бизга сабоқ бўлади. Биз таслим бўлмаймиз, охиригача курашишда давом этамиз.