Англия терма жамоаси ҳамда "Челси" ҳужумчиси ҳали ҳам фуқароликка оид якуний қарорни қабул қилмади.
21 ёшли "Челси" ҳужумчиси Тэмми Абрахам Англия термасида икки марта - 2017-йилда Германия ва Бразилияга қарши ўйинларда майдонга тушган. Аммо, бу ўртоқлик учрашувлари эди ва Нигерия ҳанузгача ҳужумчини ўз байроғи остида жалб қилишга умид қилмоқда.
"Мен бундай суҳбатлар ҳақида эшитганман, лекин бу ҳақда ўйламаганман. Вақт ўтиши билан ҳаммаси аниқ бўлади.", - деди Абрахам The Telegraph нашрига.
"Ҳеч нарсани инкор қилиб бўлмайди. Ҳозир "Челси"га бор эътиборимни қаратмоқдаман".
Маълумот ўрнида, АПЛнинг дастлабки беш турида Тэмми Абрахам еттита гол урди ва Серхио Агуеро билан биргаликда тўпурарлар жадвалида етакчилик қилмоқда.
Эслатиб ўтамиз, "Челси" эртага ЕЧЛда "Валенсия"га қарши навбатдаги учрашувини ўтказади.
