Хорватиялик ҳужумчи Анте Ребич қўпол ўйини ва номақбул хатти-ҳаракатлари учун жазоланадиган бўлди. УЕФА расмий сайтида айтилишича, Анте Ребич келгусида бешта учрашувда майдонга туша олмади.
Бунга сабаб сифатида унинг Европа лигасининг плей-офф раундида «Страсбур»га қарши ўтказилган ўйиндаги қўполлиги ва учрашув расмийларини ҳақорат қилгани кўрсатилмоқда.
Бундан ташқари, франкфуртликларнинг спорт директори Бруно Хюбнер УЕФА тизимидаги мусобақаларнинг иккита учрашувидан четлаштирилди.
Эслатиб ўтамиз, Анте Ребич ижара асосида «Милан»га ўтди. Италия клуби эса еврокубок мусобақаларига чиқа олмади. Шу сабаб хорватиялик футболчи жазо муддатини кейинроқ ўтайди.
Ёдингизда бўлса, айнан шу футболчи Жаҳон чемпионати давом этаётган бир пайтда ҳамюртимиз Равшан Эрматовнинг ҳакамлилиги борасида танқидий фикрлар билдирган эди. Олдин ўзингга боқ... деб шуни айтсалар керак.
