Сингапур терма жамоаси бош мураббийи Татсума Йошида ЖЧ-2022 саралаш босқичи доирасида бўладиган Ўзбекистонга қарши ўйин олдидан ўз фикрларини билдириб ўтди.

"Биз фақат ҳимояда ўйнашимиз мумкин. Барча 11 нафар футболчини жарима майдонимиз атрофида жойлаштириб, рақибнинг бор-йўғи 1:0 ёки 2:0 ҳисобида ғалаба қозонишини чеклашимиз мумкин. Лекин бу биз учун яхши эмас.

Биз ўрганишга ва мукаммал ўйин намойиш этишга ҳаракат қилишимиз керак. Шундай ҳаракат қилмасак, бизда имконият бўлмайди. Лекин рақибнинг кучсиз томонидан фойдаланишга ҳаракат қилсак, бизда ғалаба учун имконият бўлади. Шунга ҳаракат қилиб кўришимиз — мен учун муҳим аҳамиятга эга.

Саудия Арабистони ҳар томонлама биздан яхши ўйнади. Биз уларнинг кучсиз томонини топа олмадик. Ўзбекистон эса вертикал ўйин намойиш қилади. Биз керакли жойда зич ҳимояланишимиз, рақибга босим қилишимиз ва имконият қидириш учун олдинга чизиққа тезкор узатмалар беришимиз керак", — деди Йошида.