Эронда футзал бўйича Осиё чемпионатининг Марказий ва Жанубий минтақаси бўйича саралаш баҳслари якунланди.

Ўзбекистон миллий терма жамоаси сўнгги турда Тожикистонга қарши майдончага чиқди. Учрашувнинг дастлабки 3 дақиқаси ичида қўшниларимиз футболчиси Баҳодур Хўжаев дарвозамизга иккита гол уришга муваффақ бўлди. Биринчи бўлим ўрталарига келиб вакилларимиз ташаббусни ўз қўлларига олишди ва танаффусга қадар рақиб дарвозасига 5та тўп киритишди.

Иккинчи таймда эса устунлик Баҳодир Аҳмедов шогирдлари томонида бўлди ва терма жамоамиз 9:3 ҳисобида ғалаба қозонди.

Шу тариқа, футзал бўйича Ўзбекистон миллий терма жамоаси саралаш босқичининг ҳар учала баҳсида ғалаба қозониб, 9 очко жамғарган ҳолда гуруҳда 1-ўринни эгаллади.

Қитъа чемпионатининг финал босқичи 2020 йилнинг 24 февраль - 10 март кунлари Туркманистон пойтахти Ашхобод шаҳрида ўтказилади. Футзал бўйича жаҳон чемпионати эса 2020 йилнинг 12 сентябрдан 4 октябрга қадар Литва мамлакати ўтказилади. Осиёдан 5та терма жамоа Мундиал йўлланмасини қўлга киритади.

Футзал: Осиё чемпионати-2020 саралаши
Марказий ва Жанубий минтақа | “А” гуруҳи
Ўзбекистон – Тожикистон 9:3 (5:2)
Голлар: Акбар Усмонов (8, 16), Ҳусниддин Нишонов (15), Дилшод Раҳматов (18), Даврон Чориев (19, 26, 28), Хушнур Эркинов (26), Дилмурод Шавкатов (29) - Баҳодур Хўжаев (1, 3), Раҳмонали Шарипов (31).
Ўзбекистон: 12.Равшан Элибоев, 4.Ихтиёр Ропиев, 6.Илҳомжон Хамроев, 8.Хусниддин Нишонов, 14.Суннатулло Жўраев.
Захира: 1.Рустам Умаров, 2.Хушнур Эркинов, 3.Машраб Адилов, 5.Шаҳзод Садиев, 7.Дилшод Раҳматов, 9.Дилмурод Шавкатов, 10.Даврон Чориев, 11.Акбар Усмонов, 13.Дилмурод Жумаев.