Барча футболчиларга ҳам замонамизнинг икки даҳоси билан тўп суриш насиб этавермайди. Бугун ана шундай бахтга тақдир томонидан муносиб кўрилган футболчилар ва улар томонидан бу икки юлдуз ҳақида билдирилган фикрлар билан танишиб ўтамиз.
Деко
Португалиялик футболчи икки мега юлдуз билан тўп суришга биринчилардан бўлиб муваффақ бўлганлардан бири. Келиб чиқиши бразилиялик бўлган ярим ҳимоячи майдонни яхши кўра олар ва жамоанинг ҳужумларини бошлаб берар эди. Қаҳрамонимиз Криштиану билан сал кам 7 йил давомида терма жамоа шарафини ҳимоя қилган ва 2004-йилдаги қитъа биринчилигида кумуш медалларга эга чиққанлардан бири саналади. Лео билан эса, совринлар бироз кўпроқ. Аргентиналик футболчи билан 4 йил давомида бир жамоада тўп сурган ярим ҳимоячи икки бор Испания чемпионлигини ва бир бор ЕЧЛ ғолиблигини қўлга киритгани таҳсинга сазовар. Шундай бўлса-да, Деко улардан ёш жиҳатидан каттароқ бўлгани боис икки футболчини ўз укалари сингари яхши кўришини кўп бор таъкидлаб ўтган. Ўзининг интервьюларидан бирида икки футболчидан бирини танланг деган саволга эса, қуйидагича жавоб берган эди:
“Роналду ёш ва жисмонан бақувват футболчи бўлиб, доиммо ғалаба қозонишни яхши кўрадиганлар сирасига кирар эди. Месси эса, ҳозир амалга ошираётган ишларини ўзлаштириш учун тинимсиз изланиш билан банд пайтида Роналдиньо барчасини осонлик билан амалга оширар, ва ўзгача услуб эгаси эди. Унга тўп етказсангиз, бир нуқтанинг ўзидан бир неча хил улсубда гол киритишга шубҳа қилмасангиз ҳам бўлади. Рони мен кўрган йигитлар ичида энг зўри!"
Карлос Тевес
Карлитос бемалол Роналду ва Месси даражасида тўп суриши мумкин эди, бироқ унинг оғир характери ва тинимсиз жанжаллари карьерасига болта урди. Роналду билан “Манчестер Юнайтед”да бирга тўп сурган қаҳрамонимиз 5 та совринга эга чиқишни уддалаган. Улар орасида ЕЧЛнинг “шалпангқулоғи” ҳам мавжуд эканлигини эътиборга молик. Лео билан биргаликда Аргентина терма жамоасида тўп сурган Тевес бирорта мусобақада ғолиб чиқишни уддалай олгани йўқ. 2011-йилдан бошлаб эса, Тевес терма жамоага умуман чақирламади. Шунга қарамай, бу икки юлдуз ҳақидаги фикрлари билан ўртоқлашишга улгурди:
“Мессини бирор маротаба жисмоний машғулотлар залида кўрмаганман. Унинг техник юкламалар устида ишлаганини ҳам кўрмаганман. Очиғи, бирорта машғулотда барчадан сўнг уйига кетмаган ҳам бўлса керак. Роналду эса, унинг тамомила акси. У бирор маротаба машғулотлардан сўнг уйига кетмаган. Жисмоний машқлардан сўнг, зарбалар устида ишлар, барча жабҳаларда энг зўри бўлиш учун меҳнат қилишни ҳуш кўрадиган спортчи эди. У клуб базасига барчадан аввалроқ етиб келар, ундан эрта келишнинг иложи йўқдек туюлар эди. Соат эрталабки 9 да белгиланган машғулотларга бир соат аввалроқ борсам, у аллақачон машқларни бошлаб юборган экан. Ўша куни 7:30 да борганимда ҳам ундан эртароқ келишни уддалай олмаган бўлар эдим".
Анхел ди Мария
Бу футболчи нафақат икки футболчи билан бир жамоада тўп сурган, балки иккаласи билан дўстона алоқаларни ўрнатган кам сонли футболчилардан бири. Ди Мария Роналду билан биргаликда “Реал Мадрид” сафида кўплаб совринларга эга чиқибгина қолмай, ўз фаолиятидаги ягона ЕЧЛ ғолиблигини ҳам қўлга киритишга муваффақ бўлади. Лео билан эса, ЖЧдаги кумуш медаль ҳозирча сўнггиси бўлиб турибди. Анхелнинг улар борасидаги саволларга берган жавоби самимий бўлгани учун мана шундай топ-интервьюлар орасидан жой олган бўлса, ажам эмас.
“Роналду ва Месси икки хил услубда тўп сурувч футболчилар. Умуман олганда, улар ўртасида умумий ҳеч нарса йўқ десам адашмаган бўламан. Месси жуда катта тезлик эгаси бўлгани боис, кичик масофаларга барчадан яхши югуради ва бир нечта ҳимоячилардан ўтиб кетишга қодир. Роналду узоқ масофаларга тезлик олиш борасида барчадан чаққонроқ. У тўпни жуда катта масофа ўзи билан олиб бориб кучли зарба йўллашга қодир. Шунинг учун унинг голлари сони Леоникидан кўпроқ. Нима бўлганда ҳам гап дунёнинг икки буюк футболчиси ҳақида бормоқда. Улардан бирини танлаш жуда мушкул".
Гонсало Игуаин
Роналду билан бир жамоада тўп сураётган аргентинлаик ҳужумчи “Реал Мадрид” сафида 4 йил Криш билан тўп сургани ёдингиздан кўтарилмаган бўлса керак. Гонсало ушбу 4 йил давомида ички биринчиликдаги барча совринларни қўлга киритишга муваффақ бўлган. Афсуски, Игуаиннинг терма жамаодаги фаолиятини мақтаб бўлмайди. Мессининг барча омадсиз мусобақаларида бош антиқаҳрамон ролини ҳеч кимга бермаган ҳужумчининг улар ҳақидаги фикрлари билан танишинг:
“Бу савол барчани қизиқтириши аниқ, бироқ бунинг жавоби жуда оддий. Улар футболдаги чинакам “йиртқичлар” ва ўз услубини мукаммалик даражасига олиб чиқишга муваффақ бўлган йигитлар. Уларни солиштириш бефойда. Бу худди Касильяс ва Буффонни солиштиришга ўхшайди. Яхшиси, уларнинг ўйинларидан завқ олиш лозим".
