«Манчестер Юнайтед» ҳужумчиси Маркус Рэшфорд жароҳат олиб, сафдан чиқди. Англия кубогининг 3-босқичи доирасида «Вулверхэмптон»га қарши бўлиб ўтган такрорий ўйинда 22 ёшли футболчи белидан жароҳат олди.

«Рэшфордни майдонга тушириш қарори салбий оқибатларга олиб келди. Яқин кунларда у тиббий текширувдан ўтади. Кўрамиз, у якшанба куни бўладиган навбатдаги ўйингача тайёр бўлишга улгурармикан. У ўйин давомида белида оғриқ ҳис қилди ва шундан сўнг яна зарба қабул қилди», – деди «МЮ» бош мураббийи Уле-Гуннар Сульшер.

«Юнайтед»нинг навбатдаги рақиби «Ливерпуль» ҳисобланади. «Энфилд»даги ўйин 19 январь куни Тошкент вақти билан 21:30да бошланади.

Рэшфорд ушбу мавсумда манкунианликлар сафида 30та ўйинда майдонга тушиб, 19та гол урди ва 5та голга узатма берди.