«Барселона» Испания чемпионатининг 20-тури доирасида ўз уйида «Гранада»ни қабул қилди. "Кўк-анорранглилар" янги бош мураббий Кике Сетьен учун дебют ўйин осон бўлмади. Шунга қарамай, у илк учрашувда ғалаба қозонишга муваффақ бўлди.

Каталонияликлар ўйин давомида устунликка эришишди, кўп вазиятлар яратишди, аммо ҳадеганда тўп рақиб дарвозасига кира қолмади.

Иккинчи бўлимда эса ўйин тақдири таъсир кўрсатган иккита вазият юзага келди. Баҳснинг 66-дақиқасида "Гранада" футболчи Этеки 20 метрлардан зарба йўллаб, "Барселона" дарвозаси устунини нишонга олган бўлса, орадан 3 дақиқа ўтиб Херман Санчес иккинчи сариқ карточкани олиб, майдонни тарк этди.

Учрашувнинг 76-дақиқасида каталонияликлар томонидан уюштирилган чиройли ҳужум гол билан якунланди. Месси-Гризманн-Видаль-Месси комбинацияси якунида Артуро товони билан аргентиналик футболчини тўп билан таъминлади. Жамоа сардори эса вазиятдан фойдаланиб ҳисобни очди.

"Барселона" битта тўп фарқдаги устунликни сақлаб қолди ва ўз очколарини 43тага етказди. Жамоа тўплар фарқига кўра "Реал"ни ортда қолдирмоқда.

Испания Ла лигаси, 20-тур
Барселона – Гранада 1:0 (0:0)
Гол: 1:0 – 76 Месси.
Барселона – тер Стеген, Сержи Роберто, Пике, Умтити, Альба, Бускетс, Видаль (Артур, 83), Ракитич (Пуч, 71), Фати (Карлес Перес, 79), Месси, Гризманн.
Гранада – Руй Силва, Фулькье, Херман Санчес, Дуарте, Диас, Вадильо (Пуэртас, 65), Гоналон, Этеки (Мартинес, 72), Азиз (Эррера, 56), Мачис, Фернандес.
Огоҳлантиришлар: Мачис (12), Херман Санчес (59), Фернандес (72).
Четлатиш: Херман Санчес (69).