“Манчестер Сити”нинг “Реал”га қарши ўйинлардаги имконияти ҳақида гап кетганда, АПЛ даги вазиятдан келиб чиқишни маслаҳат бермаган бўлардим.

Ҳа, у ерда Пеп Гвардиола шогирдлари беқарор, ҳа, “Ливерпуль” билан орадаги фарқ 22 очкони ташкил қилмоқда – бир қараганда бу фарқ жамоалар ўртасидаги даражани ҳам белгилаб берадигандек. Агар “ПСЖ” ва ундан 22 очко ортда бораётган таъқибчи ҳақида гап кетганида, бу тўғри, лекин “Манчестер Сити” барибир “Ливерпуль” билан бир даражадаги ва Европанинг энг кучли жамоаларидан бири бўлиб қолаверади.

Тасаввур қилинг, сиз “Манчестер Сити”сиз. “Ливерпуль”га ета олмайсиз, ҳамма ўйинни ютган тақдирингизда ҳам, “Ливерпуль” ҳам худди шундай қилади. Пастга ҳам тушиб кетмайсиз, таъқибчиларингиз сиздан бадтар беқарор. Хўш, бундай вазиятда, бор имкониятни ишга солиб, ғалабали сериялар амалга ошириш мумкинми?

Тўғри, “Сити” профессионал клуб, футболчилар ҳам ҳар ўйинда ғалаба учун майдонга тушишади, мухлислар учун ўйнашади, қўшиламан. Лекин биласизми, ҳамма ўйинни ютиш учун бу етарли эмас. Ҳар ўйинга бор кучни ташлаш учун барибир турнир мотивацияси ҳам жуда зарур бўлади.

Айта оласизми, агар ҳозир ҳаммаси нолдан бошлаб, “Сити” ва “Ливеруль” чемпионлик учун курашга киришишса, яна Клопп осонлик билан ўзиб кета оладими? Йўқ, албатта, таркиб, ўйин, имконият, умуман ҳамма масалаларда “Манчестер Сити” “Ливерпуль”дан ҳозир кўриниб турган даражада кучсиз эмас. Айрим жиҳатларда устун ҳам, ишонаверинг.

Айтмоқчиманки, “Реал”га қарши “Ливерпуль”дан 22 очко ортда бораётган беқарор “Манчестер Сити” эмас, ғолиблик учун асосий даъвогар бўлган, ҳар жиҳатдан Европанинг энг зўрларидан бири бўлган “Манчестер Сити” ўйнайди.

Чунки бу ерда ҳаммаси нолдан бошланмоқда.

Қаҳрамон АСЛАНОВ.