Лондоннинг «Арсенал» клуби мухлислари ҳамон кўп, биламиз. 90-йиллардан бошлаб "тўпчилар" фантастик ёрқин футбол кўрсатишни бошлашган. Ўша даврларда тезкорлик ва комбинацион футбол бўйича нафақат Англияда, балки бутун Европада унча бунча жамоалар «Арсенал»га бас келолмасди. Чемпион бўлишди, рекордлар қайд этишди. Футбол эстетларининг меҳри ошиб борди.

Аммо сўнгги мавсумлар ушбу мухлисларга ҳавас қилиб бўлмайди. Аввал клуб чемпионлик пойгасидан тушиб қолди. Уёғига Чемпионлар лигаси зонаси ҳам муаммога айланиб боряпти. Клуб босслари жуда бефарқ деб бўлмайди. Вазиятни ўзгартириш чоралари кўрилмоқда. Таркиб ёмонмас. Ёш, истеъдодли, амбицияли мураббий олиб келинди. Плюс у ганнер... “бир марта ганнер - бир умр ганнер”, деган гап бор. Буёғига ҳаракат қилиш қолмоқда.

Муаммо нимада? «Арсенал» қоқилган даврида АПЛнинг анча клублари ўсди. Рақобат дахшат даражада кучайиб кетди. Бўшашганлар олтиликдан учириб юборилмоқда. «Арсенал» айни вақтда 9-ўринда.

Премьер-лига орқали Чемпионлар лигасига чиқиш Эверест чўққисидек узоқ ва қийин манзил. Европа элитасида қолишнинг ягона йўли қолмоқда. Ҳа, Европа лигаси ғолиблиги! Ютасан ва тўғридан-тўғри зўрлар қаторига кирасан.

Ана шу йўлда «Арсенал» бугун навбатдаги тўсиқдан ўтишига тўғри келади. Рақиб анчагина мураккаб. Греция чемпионати мутлақ етакчиси "Олимпиакос". Биринчи учрашувда греклар ўз уйида 0:1 ҳисобида ютқазишди. Лондонга улар жанг қилиш ва “ўлиш” кайфияти билан боришади. Зўр ўйин бўлади, насиб қилса.

Сизни 00:50 да UzReportTV жонли эфирида кутаман, шу учрашувни бирга томоша қиламиз.

Даврон Файзиев.